მთავარი

“მწვანე სახლი”, როგორც ინსტიტუცია, ფრანგული ფსიქოანალიზის წიაღში შეიქმნა. მისი დამაარსებელი ფრანსუაზ დოლტოა, ბავშვთა ფსიქოანალიტიკოსი, ფსიქიატრი, პედიატრი, რომელმაც 1979 წელს პირველი მწვანე სახლი (La Maison Verte) გახსნა პარიზში. მცირეწლოვანი ბავშვებისა და მათი მშობლების მიღების ეს მოდელი შემდეგ მსოფლიოს მრავალ ქვეყანაში გავრცელდა.

ბუნებრივია, დოლტოს “მწვანე სახლს”, როგორც პირველადი სოციალიზაციისა და პრევენციის უნიკალურ მოდელს, დღემდე განსაკუთრებული ადგილი აქვს ჩვენს ორგანიზაციაში, თუმცა 2006 წლიდან მომსახურება თანდათანობით გაფართოვდა და თერაპიების სხვა სახეებიც მოიცვა. დღეს ჩვენი “მწვანე სახლი” ბავშვებსა და მოზარდებს უკვე სხვადასხვა თერაპიულ სერვისებს სთავაზობს. ესენია: ინდივიდუალური ფსიქოთერაპია, არტთერაპია, ქვიშით თერაპია, მუსიკით თერაპია, ფლორთაიმი, მითოდრამა, მეტყველების თერაპია, სპეცპედაგოგის დახმარება, ადრეული განვითარების სახელმწიფო პროგრამა. თითოეულ თერაპიულ მომსახურებას საკუთარი სპეციფიკა, საკუთარი მიდგომა და თერაპიული ჩარჩო აქვს. მომსახურების შერჩევა ყოველი ბავშვისა თუ მოზარდისთვის ინდივიდუალურად ხდება, მათივე საჭიროებებისა და ინტერესების შესაბამისად.

მიუხედავად მრავალფეროვანი თერაპიებისა, მწვანე სახლში შემთხვევათა განხილვა, ანალიზი და სუპერვიზირება ფსიქოანალიტიკური მიდგომით მიმდინარეობს და ეს მწვანე სახლის სპეციფიურობას განსაზღვრავს. ამ წლების მანძილზე მწვანე სახლის თანამშრომლებს სუპერვიზიასა და პროფესიულ დახმარებას უწევს ფრანგული ორგანიზაცია ESPACE ANALYTIQUE (Association de Formation Psychanalytique et de Recherche Freudienne) .

2011 წელს მწვანე სახლმა ფილიალი გაიხსნა ქალაქ ახალციხეში, რომელიც 2015 წელს ცალკე ასოციაციად დარეგისტრირდა. 2024 წლიდან კი კიდევ ერთი ფილიალი აქვს ქალაქ მცხეთაში, ქ. მცხეთისა და მცხეთა-მთიანეთის რეგიონის ბავშვებისა და მოზარდების მომსახურებისთვის. დაარსებიდან დღემდე მწვანე სახლის მუდმივი პარტნიორია საფრანგეთის საელჩო საქართველოში.